المووت علينا حق... الموضوع كوميدى جدا غير العنوان خااااااااااالص

صباح الخير او مساء الخير حسب الوقت الى هتتكرموا عليا فيه و تقروا الموضوع بتاعى
تعودنا على الصراحه و الجرئه
بس موضوع النهارده ملوش دعوه بالجرئه خالص هوه كوميدى بحت
و خلى بالكم من بحت دى حتى ابقوا اسالوا الدكتور الى ساكن تحتنا............
هنرجع لموضوعنا تانى

الموت هوه الحقيقه الوحيده المضمونه فى الحياه.... مساء النكد و الكأبه
الموت هى حادثه بتحصل فى حياه الانسان مره واحده بس الحادثه دى بتهز كيان الناس الى حواليه و تطلع منهم اسئله عن الحياه و الموت و بتطلع اسئله عن فائده الميلاد و حكمه الموتو بتطلع من جواهم حاجه اغرب من حقيقه الموت نفسه ......( النعي) الى بيبقى فى الجرايد
النعى هوه مجموعه العبارات و الاسماء و الالقاب الى بتتجمع فى اعلان بمساحه نصف عمود و حتى مساحه 4 عواميد او حتى بمساحه الصفحه كلها... و دا طبعا بيتوقف على قيمه الميت فى قلوب حبايبه او حسب حجم الطمع فى قلوب الورثه........
لما تجيب اهرام الجمعه تقرا حوالى اخر 50 صفحه ....ههههههههههه حد يقولى هو الجرنال اصله كام صفحه هههههههه بهزر
المهم هتلاقيها مليانه اعلانات موت و طبعا اعلانات الموت بتختلف من شعب للتانى انا مثلا لما كنت فى المانيا شوفت اعلانات زى البوسترات و معلقين بوستر كبير جدا لراجل و ست كل الى عملوه فى حياتهم انهم ماتوا تخيلوا.... و كان ايه ولا بوستر احمد السقا فى فيلم الجزيره
اعلانات الموت برضه عندنا ملهاش مبرر غير ان فيه حد مات و ان فيه حد ملتزم انه يبلغ شعب مصر و الدول العربيه الى بيتوزع فيها الاهرام ان فلان الفلانى الله يرحمه مات
لكن يا ريته فلان الفلانى بس...لا هما تقريبا بيكتبوا فى النعى اسم اى حد شافه فى حياته يعنى مثلا بيكتبوا كدا
توفى الى رحمه الله تعالى السيد الواء فلان الفلانى زوج السيده فلانه الفلانيه كريمه المرحوم فلان الفلانى و المرحومه فلانه الفلانيه ووالد النقيب فلان الفلانى زوج السيده فلانه الفلانيه و المحاسب فلان الفلانى زوج السيده فلانه الفلانيه شقيق المرحوم لواء طيار فلان الفلانى و الواء بحرى المرحوم فلان الفلانى و المرحومه حرم المرحوم فلان الفلانى جد السيد فلان الفلانى و المهندس فلان الفلانى و الطالب فلان الفلانى و قريب و نسيب عائلات كل من عائله فلان و عائله علان و كان ناقص كمان يكتبوا اسم طابونه العيش و المكوجى الى كان بيتعامل معاهم....(مش منطقى)........ مهزله
يا نهار ابيض كل دا كلام و كل دى ناس على فكره بجد النعى لسه ليه بقيه بس انا عارف انكم زهقتوا و لعنتم فلان على فلانه على علان بس انا مش عايز اخنقكم اكتر من كدا اصل دا نعى 600 كلمه بس مين الى فيه قلب يقرا الكلام دا كله و ذنب البشريه ايه تقرا الكلام دا كله ما الى مات مات و خلاص و انتهينا .. يعنى نعى زى الى انا قريتلكم منه دى يتكلف مثلا 5 او 6 الاف جنيه ... هتقولى مبلغ عبيط اه مبلغ عبيط....يادوب يكفى اسره مرتبها 500 جنيه لمده سنه ...... سنه كامله من مرتب اسره مصريه اتصرفت على روح المرحوم و روح قرايبه التانيين
يعنى الاف الاسر كانت هتعرف تعيش لو المرحوم كان عايش بدل المصاريف الىاتصرفت دى كلها كان زمانه فتح بيها بيوت كتير او بمعنى اصح لو المرحوم كان مات بهدوء من غير الدوشه دى كلها ..... طيب هما لو بيحبوه قوى كدا كانوا طلعوها فى حاجه خير و تبقى صدقه جاريه الناس تستفيد بيها احسن من اعلانات الموت فى الجرايد و بالمناسبه دى انا بفكر اعمل قسم للوفيات هنا فى المنتدى بتاعنا......اه قسم للوفيات بس هتتكتب و تتنشر بطريقتنا و هيبقى النعى كالاتى قد توفى فلان الفلانى الى عمل كذا او اخترع كذا و بس علشان الناس تفتكره باعماله...... اكيد طبعا بهزر وفيات ايه الى هنفتحها هنا فى المنتدى.....
على العكس تماما فيه نوع من الناس بتعمل اعلانات موت فى الجرايد بس ببخل شويه و كنت سمعت عنهم نكته
بيقولك مره واحد بخيل ابوه مات حب يعمله نعى فا راح للجرنال قالهم انا عايز اعمل نعى فى الجرنال بس يكون اصغر حاجه قالولو اصغر حاجه 5 كلمات فقط... قالهم طيب اكتبوا( رزق ينعى والده)
قالولو كدا فاضلك كلمتين قالهم ( و بيصلح تلاجات)
يا ريت يكون الموضوع عجبكم و اسف انى طولت قوى كدا عليكم
تقبلوا تحياتى
و الى الحلقه القادمه من
جعلونى متمردا.......

اقتباس :

بيقولك مره واحد بخيل ابوه مات حب يعمله نعى فا راح للجرنال قالهم انا عايز اعمل نعى فى الجرنال بس يكون اصغر حاجه قالولو اصغر حاجه 5 كلمات فقط... قالهم طيب اكتبوا( رزق ينعى والده)
قالولو كدا فاضلك كلمتين قالهم ( و بيصلح تلاجات)

هههههههههههه

جميله جدا

طبعا عندنا يختلف الوضع

اسهل وسيله ومجانا وهيا النعى ف المساجد

وربنا يرحم اموات المسلمين

بس جميل الموضوع

توفى الى رحمه الله تعالى السيد الواء فلان الفلانى زوج السيده فلانه الفلانيه كريمه المرحوم فلان الفلانى و المرحومه فلانه الفلانيه ووالد النقيب فلان الفلانى زوج السيده فلانه الفلانيه و المحاسب فلان الفلانى زوج السيده فلانه الفلانيه شقيق المرحوم لواء طيار فلان الفلانى و الواء بحرى المرحوم فلان الفلانى و المرحومه حرم المرحوم فلان الفلانى جد السيد فلان الفلانى و المهندس فلان الفلانى و الطالب فلان الفلانى و قريب و نسيب عائلات كل من عائله فلان و عائله علان و كان ناقص كمان يكتبوا اسم طابونه العيش و المكوجى الى كان بيتعامل معاهم....(مش منطقى)........ مهزله
.. يعنى نعى زى الى انا قريتلكم منه دى يتكلف مثلا 5 او 6 الاف جنيه ... هتقولى مبلغ عبيط اه مبلغ عبيط....يادوب يكفى اسره مرتبها 500 جنيه لمده سنه ...... سنه كامله من مرتب اسره مصريه اتصرفت على روح المرحوم و روح قرايبه التانيين ومين اللى هيسمعك